Zv/kryeministri i qeverisë së Maqedonisë së Veriut, Artan Grubi është shprehur me tone optimiste për zgjidhjen e kontestit me Bullgarinë.
Në emisionin “24 analiza”, Grubi shpreson se zgjidhja do të arrihet me ndihmën e Brukselit dhe Uashingtonit, përcjell agjencia e lajmeve INA.
Grubi theksoi se nuk ka propozime të reja për ndryshime dhe plotësime, por ka zbatim të Marrëveshjes për fqinjësi të mirë.
“Propozimin e Portugalisë e propozuam, thamë se është bazë e mirë për zgjidhjen e kontestit, ndërsa Bullgaria nuk e priti mirë. Propozimi i sotëm i ynë është që të punohet për një përpjekje për adresim të shqetësimeve të tyre, ndërsa absurde është të thuhet se Maqedonia ka pretendime territoriale ndaj Bullgarisë”, tha Grubi.
“Kontestet e sotme nuk mund të zgjidhen me mendime nga shekulli i 18-të ose 19-të për shkak se jemi në shekullin e 21-të. Kontesti mund të zgjidhet vetëm nëse shohim tek e ardhmja”, tha Grubi. (INA)
