“I sëmurë”, prokurori “shpëton” nga burgu agresorin e sulmit në xhami, reagon Ahmed Kalaja

Imami Ahmed Kalaja, i xhamisë “Dine Hoxha” në rrugën e Kavajës, ka publikuar disa dokumente në rrjetet sociale ku thuhet se prokurori i çështjes, ka falur agresorin Rudolf Nikolla i cili disa muaj më parë sulmoi kalimtarët dhe besimtarët që faleshin në xhami me anë të një thike.

Ngjarja ndodhi gjatë muajit të shenjtë të Ramazanit, në prill të këtij viti, ku Rudol Nikolla me një thikë në dorë u fut në xhaminë “Dine Hoxha” dhe sulmoi besimtarët. Ishin këta të fundit që e neutralizuan dhe më pas e dorëzuan në polici, ndërsa së fundmi mësohet se prokurori i çështjes Hysni Mulaj e ka mbyllur hetimin pa paraqitur si kërkesë për dënim me burg për agresorin duke e cilësuar si të sëmurë mendor dhe duke kërkuar që t’i nënshtrohet kurimit.

Lexo Edhe:
FOTO/ Media e huaj rendit 10 meshkujt shqiptarë më të bukur për këtë vit, kush është i pari
Në dokumentin e publikuar nga vetë imam Ahmed Kalaja, prokurori i çështjes ka nxjerrë këto konstatime:

“1) Personi në hetim Rudolf Nikolla vuan nga probleme të shëndetit mendor.
2) personi në hetim plotëson kriteret për diagnostiko për çrregullim psikotik i pa specifikuar.
3) Personi në hetim nuk është i përgjegjshëm për veprën e kryer, pasi gjykimi dhe sjellja e tij janë udhëhequr prej çrregullimit të mendimit, emocionit dhe perceptimit.
4) Personi nën hetim për shkak të sëmundjes prej së cilës vuan, nuk ka qenë në gjendje të kuptoj dhe të kontrolloj veprimet e tij dhe pasojat që rrjedhin prej tyre.
5) Personi në hetim, prezanton risk të lartë për sjellje të paparashikueshme.
6) Personi në hetim, aktualisht prezanton simptomë psikotike aktive, të sëmundjes prej së cilës vuan.
7) Personi duke vlerësuar riskun për sjellje të paparashikueshme nëpërmjet HCR 20, ku analizohet historia për sjellje të paparashikueshme, klinika aktuale e menaxhimit të riskut në të ardhmen, i rekomandohet masa mjekësore e “Mjekimit të detyruar në një institut mjekësor”, thuhet në dokument.

Më pas prokurori çështjes thekson dhe arsyen se pse nuk mund të japë një dënim me burg për këtë vepër penale.

“Për sa i përket përgjegjësisë penale për kryerjen e veprës penale nga ana e të pandehurit Rudolf Nikollaj, për shkak se ai ka rezultuar i papërgjegjshëm para ligjit për veprën e kryer, e për pasojë nuk mund të akuzohet apo dënohet për kryerjen e saj, për këto arsye ne do i drejtohemi Gjykatës së Rrethit gjyqësor Tiranë, kjo në mbështetjet të neneve 46 të Kodit Penal dhe 46 të K. Pr. Penale me kërkesë: Për caktim e masës mjekësore “Mjekim i detyruar në një institucion mjekësor” ndaj të pandehurit Rudolf Nikollaj, sipas nenit 46, pika 2 e K, Penal”, thuhet në këtë dokument, ku bëhet i ditur edhe përfundimi i hetimeve.

Ndaj këtij vendimi të prokurorit të çështjes ka reaguar imam Ahmed Kalaja, që ka cilësuar si të padrejtë.

“Publikojmë për të gjithë ju mbylljen e hetimit mbi rastin e plagosjes së ndodhur në Ramazan. Çfarë bëhet? Ku synojnë? As gjyq as thirrje të të plagosurve?? A mund të jetë ndonjë familjar i prokurorit viktima e radhës ?! Vjen erë apo më duket mua ????”, shkruan Kalaja.

Rudolf Nikollaj njihej një person me precedentë penal, ai edhe më parë kishte plagosur një person tjetër në terminalin e autobusëve të Tiranës, duke e goditur me thikë. Ndërsa babai i tij shprehej se i biri ishte me të meta mendore dhe se ai u kthye në një praktikues i besimit mysliman, nga ai katolik që kishte, duke pretenduar se u mashtrua. “